प्रधानमंत्री-कोरोना
प्रधानमंत्री नरेन्द्र मोदी ह किहीन हे कि देस कोरोना योद्धा मनके सेती पूरा मजबूती ले कोरोना संक्रमण ले लड़त हे। श्री मोदी ह आज परम सम्मानित जोसेफ मार थोमा मेट्रोपोलिटन के नब्बे जन्मदिन के मउका म राखे गे कारीकरम ल वीडियो कान्फेंसिंग के माध्यम ले संबोधित करत रिहीन। ओमन किहीन कि ए बछर के सुरूवात म कोनों-कोनों मन भविष्यवाणी करत रिहीन कि भारत म कोरोना वायरस के प्रभाव बहुत भयंकर होही। फेर, लॉकडाउन अउ सरकार के दूसर उपाय अउ लोगन के हिम्मत के सेती भारत ह आज बने स्थिति म हवय।
प्रधानमंत्री ह किहीन कि पूरा दुनिया कोरोना वायरस ले लड़त हे। ए महामारी ह स्वास्थ्य बर लापरवाह हमर जीवनसैली कोति धियान देवाय हे। ओमन किहीन कि गरीब मन बर सरकार ह ‘‘एक राष्ट्र-एक रासन कार्ड‘‘ योजना लेके आय हे, जेखर ले लोगन जिहां भी रइही, उहें ओमन ल रासन के सुविधा मिलही।
मन की बात
प्रधानमंत्री नरेन्द्र मोदी ह आकाशवाणी ले काली बिहनिया ग्यारह बजे ‘‘मन की बात‘‘ कारीकरम म देस-बिदेस के लोगन मन संग अपन बिचार साझा करही। ए कारीकरम आकाशवाणी अउ दूरदर्शन के जम्मों नेटवर्क अउ आकाशवाणी के वेबसाइट डब्ल्यू डब्ल्यू डब्ल्यू डॉट न्यूज ऑन एआईआर डॉट कॉम अउ न्यूज ऑन एआईआर मोबाइल ऐप म उपलब्ध रइही। ए कारीकरम आकाशवाणी, डीडी न्यूज, प्रधानमंत्री कार्यालय अउ सूचना अउ प्रसारण मंत्रालय के यू-ट्यूब चैनल म सुने जा सकही। आकाशवाणी ले ‘‘मन की बात‘‘ के हिन्दी प्रसारण के तुरते बाद ए कारीकरम के क्षेत्रीय भासा म प्रसारण करे जाही।
मलेरिया मुक्त बस्तर अभियान
प्रदेस म मलेरिया मुक्त बस्तर अभियान के दूसर चरण सुरू होगे हवय। स्वास्थ्य विभाग ह बरसा के दिन म मलेरिया संक्रमण के जादा संभावना ल देखत जांच अउ पॉजिटिव मिले लोगन ल इकतीस जुलाई तक दवई दे जाय के निरदेस दीन हे। सर्वे दल म सामिल करमचारी मन ल कोरोना संक्रमण ले बांचे बर सबो सावधानी के पालन करत अभियान ल चलाय बर केहे गेहे।
दूसर चरण म अभी तक दू लाख तिरानवे हजार लोगन के जांच होगे हवय। ए दउरान मलेरिया ले पीड़ित नौ हजार मनखे मन ल दवई घलो दे गे हवय।
कोरोना मरीज
प्रदेश म आज कोरोना संक्रमित सात झिन नवा मरीज मिले हे। एमा दुरूग के पांच अउ महासमुंद जिला के दू मरीज सामिल हे। प्रदेश म अब कोरोना संक्रमित मरीज के संख्या दू हजार पांच सौ बावन होगे हे। अभी छह सौ चौव्वन कोरोना संक्रमित सक्रिय मरीज मनके इलाज आने-आने अस्पताल म होवत हे।
दुरूग जिला म पांच झिन नवा मरीज मिले हे, जेमा तीन झिन पुलिसकर्मी अउ दू झिन बीएसएफ के जवान सामिल हे।
उहें, महासमुंद जिला म दू झिन कोरोना पॉजिटिव मरीज के पुष्टि होय हे। एमा ले एक झिन पिथौरा विकासखंड के ग्राम अर्जुनी के क्वारेंटाइन सेंटर म अउ दूसर मरीज ह बसना विकासखंड के केवटापाली क्वारेंटाइन म राहत रिहीस।
बैंकिंग-अध्यादेश
देसभर के बैंक मन म खाताधारक मनके सुरक्षा ल देखत राष्ट्रपति रामनाथ कोविंद ह बैंकिंग विनियमन संसोधन अध्यादेश-दू हजार बीस लागू करीन हे। ए अध्यादेस के माध्यम ले बैंकिंग विनियमन अधिनियम उन्नीस सौ उनचास म संसोधन करे गेहे, जेखर ले एला सहकारी बैंक मन म घलो लागू करे जा सकय। ए अध्यादेस म खाताधारक मनके फायदा बर अउ प्रसासन म सुधार ल लाके सहकारी बैंक मन ल मजबूत करे के प्रावधान करे गेहे। एखरे संग सहकारी बैंक के मामला म भारतीय रिजर्व बैंक के सक्ती के बिस्तार घलो करे गेहे।
ए संसोधन प्राथमिक कृषि ऋण संस्था या अइसन सहकारी संस्था मन उपर लागू नइ होही, जिखर मुख्य उद्देश्य अउ प्रमुख कारोबार कृषि विकास बर लंबा अवधि के ऋण देवाना हे।
सिंहदेव-पेसा कानून
पंचायत मंत्री टी.एस. सिंहदेव ह किहीन हे कि पंचायत अनुसूचित क्षेत्र बर विस्तार अधिनियम-पेसा अउ वन अधिकार कानून ल लागू करे बर छत्तीसगढ़ सरकार ह प्रतिबद्ध हे। पेसा कानून के पालन बर अनुसूचित क्षेत्र के रहवासी, समुदाय, जनप्रतिनिधि अउ आदिवासी मुद्दा के जानकार मन ले सुझाव लेके नियम तैयार करे जाही। एखर बर आदिवासी समाज के प्रतिनिधि मन ले सरलग गोठबात चलत हे।
आदिम जाति मंत्री-बैठक
प्रदेस के सबो छात्रावास अउ आश्रम म जरूरी दैनिक उपयोग के जिनीस के आपूर्ति अब स्थानीय स्व-सहायता समूह मनके माध्यम ले करे जाही। आदिम जाति विकास मंत्री डॉक्टर प्रेमसाय सिंह टेकाम ह राज्य अंत्यावसायी सहकारी वित्त अउ विकास निगम के कामकाज के समीक्षा के बेरा ए जानकारी दीन।
डॉक्टर टेकाम ह बतईन कि मुख्यमंत्री ह स्थानीय स्व-सहायता समूह के माध्यम ले छात्रावास अउ आश्रम मन म सामग्री के आपूर्ति करे जाय के इच्छा जताईन हे। एखर बर स्व-सहायता समूह मन ल उंखर जरूरत के अनुसार करजा दे जाय के सुरूवात करे जावत हे। ओमन अधिकारी मन ल निरदेस दीन कि एमा सबो काम पारदर्सी होना चाही। स्व-सहायता समूह मन बने सामग्री दे गे बेरा म उपलब्ध करावय एखर बर ओमन ल घलो मार्गदर्सन दे जाय के जरूरत हे।
खरीफ-कृषि ऋण
प्रदेश म खेती-किसानी ल बढ़ावा दे बर अउ किसान मन ल समय म खाद बीजा संघरा दूसर कृषि सामग्री उपलब्ध कराय बर सहकारी समिति मनके माध्यम ले बिना ब्याज के कृषि ऋण मुहैया कराय जावत हे। राज्य सरकार डहार ले ए बछर खरीफ सीजन म प्रदेस किसान मन ल चार हजार छह सौ करोड़ रूपिया ऋण दे जाय के लक्ष्य राखे गे हवय। अधिकारी मन ह बतईन कि चालू खरीफ फसल बर अभी तक साढ़े सात लाख ले जादा किसान मन ल करीबन दू हजार चार सौ इक्कीस करोड़ रूपिया के अल्पकालीन कृषि ऋण दे जा चुके हे।
अधिकारी मन यहू घलो बतईन कि सहकारिता के माध्यम ले अभी तक करीब पांच लाख सतहत्तर हजार मीटरिक टन खाद के भंडारण करे जा चुके हे।
सांसद रत्न पुरस्कार-छाया वर्मा
छत्तीसगढ़ के राज्यसभा सांसद छाया वर्मा ल संसद रत्न पुरस्कार बर चुने गे हवय।
प्राईम प्वॉइंट फाउंडेशन डहार ले दू राज्यसभा सदस्य अउ आठ लोकसभा सदस्य मन ल सत्रहवां लोकसभा के पहिली बछर उंखर प्रदर्सन के आधार म आने-आने श्रेणी म संसद रत्न पुरस्कार दे जाही। पूर्व राष्ट्रपति स्वर्गीय एपीजे अब्दुल कलाम के सुझाव म बछर दू हजार दस ले संसद रत्न पुरस्कार के संग लोकसभा म सुघ्घर प्रदर्सन करइया सांसद मन ल सम्मानित करे जाथे। ए बछर संसद रत्न पुरस्कार बर नामित सांसद म राज्यसभा सदस्य छाया वर्मा अउ विशम्भर प्रसाद निषाद सामिल हे। जबकि, ए पुरस्कार बर लोकसभा सदस्य सुप्रिया सुले, सुभाष रामराव भामरे, हीना गावित, अमोल रामसिंह कोल्हे, शशि थरूर, निशिकांत दुबे, अजय मिश्रा अउ राममोहन नायडू ल चुने गेहे।
माओवादी-जवान मारपीट
दंतेवाड़ा जिला म माओवादी मन ह पाछु रतिहा केन्द्रीय औद्योगिक सुरक्षा बल-सीआईएसएफ के दू झिन जवान मन संग मारपीट करीन, जेखर ले एक झिन जवान के सिर म गंभीर चोट आय हे।
पुलिस अधीक्षक अभिषेक पल्लव ह घटना के पुष्टि करत बतईन कि बचेली थाना क्षेत्र के आकाशनगर इलाका म ए जवान मन ह सिविल ड्रेस म ड्यूटी करत रिहीन। इही दउरान बारह ले जादा माओवादी मन ह उहां पहुंचीन अउ जवान मन ले मारपीट करके उंखर वॉकी-टॉकी ल घलो लूट के ले गीन। घटना के बाद क्षेत्र म सुरक्षा बल ह सर्चिंग तेज कर देहे।
मुख्यमंत्री-मुलाकात
राज्य ग्रामीण आजीविका मिशन-बिहान म चलत कल्पतरू मल्टीयूटीलिटी सेंटर सेड़ीखेड़ी म काम करत माईलोगिन मन ह आज मुख्यमंत्री भूपेश बघेल ले उंखर निवास कार्यालय म भेंट करीन। ए मउका म मुख्यमंत्री ह सेंटर के काम ल अउ बढ़ाय बर सीएसआर मद ले पन्द्रह लाख रूपिया के रासि दे जाय के घोसना करीन।
